प्रियकराच्या मदतीने पत्नीनेच केला खून : रेकॉर्डिंग च्या संशयावरून मुलीची पोलिसात तक्रार
ब्रह्मपुरी (प्रतिनिधी) : अनैतिक संबंधात अडसर ठरणाऱ्या पतीचा प्रियकराच्या मदतीने खून केल्याची धक्कादायक घटना तब्बल तीन महिन्यांनी शनिवारी उघडकीस आली. मुलीच्या तक्रारीवरून पोलिसांनी महिलेसह प्रियकराला अटक केली आहे. रंजना श्याम रामटेके (50) रा.गुरुदेवनगर ब्रह्मपुरी आणि मुकेश राजबहादूर त्रिवेदी (48) रा. हनुमान मंदिराजवळ पेठ वार्ड ब्रह्मपुरी अशी आरोपींची नावे आहेत.
शहरातील आंबेडकर चौकात आरोपी रंजना रामटेके यांचे जनरल स्टोअर्स दुकान आहे. त्यालगतच मुकेश त्रिवेदी याचे भाजीपाला व बांगडीचे दुकान आहे. त्यामुळे त्रिवेदी याचे रंजनाच्या घरी नेहमी येणे-जाणे सुरू होते. फिर्यादी मुलीने दिलेल्या तक्रारीनुसार, तिचे शिक्षण बीएससीपर्यंत झाले असून,ती नागपूर येथे एका मॉलमध्ये काम करत होती. 6 ऑगस्ट 2022 ला सकाळी तिच्या आईने फोन करून वडील हृदयविकाराच्या धक्क्याने मरण पावल्याचे सांगितले. त्यावेळी दोन्ही बहिणी नागपूर येथे होत्या. वडील वनविभागात क्लार्क पदावरून निवृत्त झाले होते. ६६ वय असल्याने हृदयविकाराने मृत्यू झाल्याचे सत्य मानून त्यांचा अंत्यविधी करण्यात आला. दोन्ही बहिणी परत नागपूरला गेल्या.दरम्यान, आईचे वागणे बदलल्याचे दोन्ही मुलींच्या लक्षात आले. त्यातच आरोपी मुकेश त्रिवेदी याचे मृतकाच्या घरी येणे जाणे वाढले होते. त्यामुळे समाजात बदनामी होत असल्याने, आईला व त्रिवेदीला मुलींनी समज दिली होती. आई एकटी राहात असल्याने लहान मुलगी काही दिवसांत ब्रह्मपुरी येथे परत आली. घटनेच्या 8-9 महिने आधी लहान मुलगी योगेश्रीने तिचा मोबाइल आईला वापरायला दिला. त्यात ती आपला सिम टाकून वापरत होती. वडील मरण पावल्यानंतर योगेश्रीला आईचा मोबाईल सहज हाताळत असताना आईच्या मोबाइलमधील त्रिवेदी यांच्यासोबत 6 ऑगस्ट,2022 ला पहाटे 2.14 वाजता तब्बल 10.57 मिनिटे बोलल्याची त्यात रेकॉर्डिंग आढळली. योगेश्रीने ही रेकॉर्डिंग आपल्या मोबाइलमध्ये ट्रान्स्फर केली. त्यात वडिलांचे हात बांधले,विषारी द्रव्य पाजले,उशीने तोंड दाबले असा उल्लेख आहे. त्रिवेदी याने अंथरूण नीट करून सकाळी सर्वांना पती मरणपावल्याचे सांग, असा सल्ला दिल्याचेही त्या संभाषणात आढळले. यावरून मोठी मुलगी स्वेता ने शनिवारी ब्रम्हपुरी पोलिसात तक्रार दाखल केली. पोलिसांनी रंजना रामटेके आणि मुकेश त्रिवेदी या दोघांना ताब्यात घेऊन कसून चौकशी केली असता, पती शाम रामटेके यांचा हत्या केल्याचे सत्य बाहेर आल्याने पोलिसांनी रंजना रामटेके व तिचा प्रियकर मुकेश त्रिवेदी यांच्याविरुद्ध भा.द.वी.120 ब.201,302अन्वये गुन्हा दाखल करून आरोपींना अटक केली आहे.
